ដឹងការពិត ក្រោយសង្ស័យ មានគ្រាប់បែក នៅក្នុងកីឡដ្ឋាន Old Trafford ធ្វើឲ្យមានការជម្លៀសអ្នកគាំទ្រ

អង់គ្លេស៖ អ្នកគាំទ្រក្លិបបិសាចក្រហម ត្រូវបានជម្លៀសចេញពីកីឡដ្ឋាន Old Trafford នៅពេលមានការប្រទះឃើញ វត្ថុសង្ស័យថាជាឧបករណ៍ផ្ទុះ នៅក្នុងបន្ទប់ទឹករួចមក។
ការប្រកួតរវាង Manchester United និង Bournemouth  ត្រូវបានរាយការណ៍មកថា ចាំបាច់ត្រូវតែលុបចោល ដើម្បីឲ្យអ្នកជំនាញដោះគ្រាប់បែក ចូលមកធ្វើការត្រួតពិនិត្យ។
វត្ថុសង្ស័យថាជាគ្រាប់បែក ដែលត្រូវបានប្រទះឃើញនោះ ពេលនេះត្រូវបានដឹងថាជាគ្រាប់បែកក្លែងក្លាយតែប៉ុណ្ណោះ ដែលត្រូវបានគេយកមកទុកចោលយ៉ាងធ្វេសប្រហែស។
មន្រ្តីប៉ូលិសនៃទីក្រុង Manchester បានអះអាងថា «បន្ទាប់ពីបានត្រួតពិនិត្យទៅលើឧបករណ៍គួរឲ្យសង្ស័យនោះហើយ តាមពិតជាឧបករណ៍ហ្វឹកហាត់ ដែលត្រូវបានទុកចោលដោយក្រុមហ៊ុនឯកជនមួយ ដែលមិនទាន់ស្គាល់អត្តសញ្ញាណនៅឡើយ។ តាមការត្រួតពិនិត្យយ៉ាងជាក់លាក់ពីអ្នកជំនាញ និងសត្វឆ្កែហឹតក្លិនរួចមក មិនមានគ្រឿងផ្ទុះឡើយ»។

អ្នកគាំទ្រជាច្រើននាក់ ត្រូវបានជម្លៀសចេញពីកីឡដ្ឋានមុន ២០នាទី នៃការប្រកួតនៅក្នុងថ្ងៃបញ្ចប់រដូវកាល បន្ទាប់ពីមានការបន្លឺសម្លេងប្រកាសអាសន្នរួចមក។
សន្តិសុខបានចាប់ផ្តើមជម្លៀសអ្នកគាំទ្រ ​ចេញយ៉ាងរហ័ស នៅម៉ោង២:៤០ រសៀល (ម៉ោងនៅអង់គ្លេស) ដោយជម្លៀសពីផ្នែក Streford End និង Sir Alex Ferguson Stand។
ចំនែកនៅប៉ែកខាងត្បូង និងខាងកើត ដែលជាប៉ែករបស់អ្នកគាំទ្រក្រុម Bournemouth គឺមិនមានផលប៉ះពាល់អ្វីទេ។ ប៉ុន្តែដោយសារមន្ត្រីប៉ូលិសបានប្រកាសថា នឹងត្រូវស៊ើបអង្កេត បន្ទាប់ពីបានរកឃើញវត្ថុសង្ស័យមួយ  ចុងក្រោយប៉ូលិស ក៏សម្រេចចិត្តជម្លៀសអ្នកគាំទ្រដែលនៅសេសសល់​ ចេញពីកីឡដ្ឋានទាំងអស់នៅវេលាម៉ោង ៣:២០រសៀល (ម៉ោងក្នុងតំបន់) តែម្តង។
ចំនែកឯកីឡាកររបស់ Manchester Untied វិញ ត្រូវបានជម្លៀសចេញពីកីឡដ្ឋានទៅក្នុងឡានក្រុងដោយសុវត្ថិភាព។
ដូច្នេះការប្រកួតរវាង Manchester United Bournemouth នឹងត្រូវលើកទៅប្រកួតនៅថ្ងៃអង្គារស្អែកនេះវិញ៕