ខេម ជួបគ្រោះថ្នាក់ចរាចរណ៍ ដែលមានអ្នកស្លាប់ និងរបួស
ប្រភពចំនួន៣ ទីមួយគឺលោក មាស សុខរតនៈ អ្នកចាត់ការទូទៅផលិតកម្ម Town សមត្ថកិច្ចក្រុមប្រចាំបញ្ជាអគ្គស្នងការដ្ឋាននគរបាលជាតិ និងមេប៉ុស្ដិ៍ឬស្សីកែវ បានថ្លែងមកកាន់ Sabay ចំពោះករណីតារាចម្រៀង ខេម ជួបគ្រោះថ្នាក់ចរាចរណ៍កាលពីយប់មិញ ដែលបានបណ្ដាលឲ្យមានមនុស្សស្លាប់ និងរបួស។
លោក មាស សុខរតនៈ ថ្លែងថា តាមព័ត៌មានដែលលោកទទួលបានពីមិត្តភ័ក្ដិរបស់ ខេម គឺតារាចម្រៀងរូបនេះ ពិតជាស្ថិតក្នុងហេតុការណ៍យប់មិញនេះមែន។ លោកថា៖” ខ្ញុំទើបឃើញព័ត៌មាននេះព្រឹកមិញដែរ លឺមិត្តភក្ដិគាត់ថាពិតមែន តែខ្ញុំទាក់ទងទៅគាត់អត់ចូលសោះ”។
លោក មាស សុខរតនៈ បន្តទៀតថា លោកកំពុងព្យាយាមទាក់ទងទៅតារាចម្រៀង ខេម ដើម្បីបានដឹងការពិតចំពោះបញ្ហានេះ។ ម្យ៉ាងទៀតលោកក៏កំពុងរង់ចាំតារាចម្រៀង ខេម ទាក់ទងមកលោកដូចគ្នាដែរ។
ដោយឡែកពាក់ព័ន្ធទៅនឹងបញ្ហានេះ សមត្ថកិច្ចក្រុមប្រចាំបញ្ជាអគ្គស្នងការដ្ឋាននគរបាលជាតិបានបញ្ជាក់ ថា ពិតជាមានករណីគ្រោះថ្នាក់ចរាចរណ៍នៅម្ដុំឫស្សីកែវ តាមបណ្ដោយផ្លូវជាតិលេខ ៥ ប្រាកដមែនកាលពីអំឡុងម៉ោង ១យប់មិញ។ ករណីនេះកើតឡើងរវាងរថយន្ត Range Rover ពណ៌សបុកគ្នាជាមួយរថយន្ត Celica ពណ៌ខ្មៅបណ្ដាលឱ្យមានអ្នករងរបួសធ្ងន់ ៣ នាក់ និងស្លាប់ ១ នាក់។
ហើយសមត្ថកិច្ចអះអាងបន្តថា នៅមិនទាន់កំណត់ថា ម្ចាស់រថយន្ត Range Rover ពណ៌សពិតជាតារាចម្រៀង ខេម ឬយ៉ាងណានោះទេ ព្រោះសមត្ថកិច្ចកំពុងស្រាវជ្រាវបន្តទៀត។ សមត្ថកិច្ចបញ្ជាក់ថា៖”ខ្ញុំកំពុងទាក់ទងទៅគមនាគមន៍ ដើម្បីឱ្យគេ ស្រាវជ្រាវតាមផ្លាកលេខឡានសិន ទើបដឹងថា ជានរណា”៕
លោក តូច គឹមសុង នាយប៉ុស្តិ៍នគរបាលឬស្សីកែវ បានលើកឡើងស្រដៀងគ្នាដែររហូតមកដល់ពេលនេះ នៅមិនទាន់អាចកំណត់អត្តសញ្ញាណម្ចាស់រថយន្ត Range Rover នៅឡើយទេ លោកទៅដល់ក្រោយករណីគ្រោះថ្នាក់ចរាចរណ៍កើតឡើងប៉ុណ្ណោះ។ លោកថា៖”ខ្ញុំមកដល់ឃើញតែអ្នកស្លាប់ទេ អ្នករបួសគេយកទៅពេទ្យអស់ហើយ។ ពេលហ្នឹងខ្ញុំសម្រួលចរាចរណ៍កុំឱ្យកកស្ទះ ហើយភាគីណាខុសត្រូវ ឬបើកលឿន យឺតយ៉ាងណា ទាល់តែខាងជំនាញ”។
យោងតាមការចុះផ្សាយរបស់សារព័ត៌មានក្នុងស្រុក នានា បានរាយការណ៍ថា មានហេតុការណ៍គ្រោះថ្នាក់ចរាចរណ៍មួយ បានកើតឡើងនៅវេលាម៉ោង១និង ៥០នាទី នៅយប់ពាក់កណ្ដាលអាធ្រាត្រឈានចូល ថ្ងៃទី១៨ ខែឧសភា ឆ្នាំ២០១៦ ស្ថិតនៅចំណុចមុខឃ្លាំងសំាង សូគីមិច តាមបណ្ដោយផ្លូវជាតិលេខ៥ ក្នុងសង្កាត់ឫស្សីកែវ ខណ្ឌឫស្សីកែវ រវាងរថយន្តម៉ាក Range Rover ពណ៌ស ពាក់ស្លាកលេខ ភ្នំពេញ 2x.9987 ធ្វើដំណើរតាមផ្លូវជាតិលេខ៥ ក្នុងទិសដៅពីជើងទៅត្បូង ខណៈដែលរថយន្តមួយគ្រឿងទៀតគឺ ម៉ាកសេលីកា ពណ៌ខ្មៅ ពាក់ស្លាកលេខ ភ្នំពេញ 2M.5575 បើកបញ្ច្រាសគ្នាលើផ្លូវតែមួយ។
រថយន្តទាំងពីរសុទ្ធតែបើកល្បឿនលឿនដូចគ្នា ពេលមកដល់ចំណុចកើតហេតុ ក៏បុកគ្នាចំពីមុខ បណ្ដាលឲ្យបុរសម្នាក់ដែលជាអ្នកបើកបររថយន្ត សេលីកា មានឈ្មោះថា លី ការិម អាយុ៣១ឆ្នាំ ស្នាក់នៅម្តុំ គីឡូម៉ែតលេខ៨ សង្កាត់ ច្រាំងចំរេះ ក្នុងខណ្ឌឫស្សីកែវ បានស្លាប់ភ្លាមៗដោយកៀបជាប់នឹងរថយន្ត។ ឯអ្នកបើកបររថយន្ត Range Rover ដែលព័ត៌មានជាច្រើនបានរាយការណ៍ថា ជាលោក ខេម រួមដំណើរជាមួយនារីមិនស្គាល់អត្តសញ្ញាណម្នាក់នោះ មិនមានរបួសធ្ងន់ធ្ងរទេ ហើយបាននាំគ្នាគេចខ្លួនភ្លាមៗ ក្រោយហេតុការណ៍។
យ៉ាងណាក៏ដោយ ចំពោះករណីខាងលើ សមត្ថិកិច្ច នៅមិនទាន់អះអាងថា ភាគីណាមួយ ជាភាគីបង្កនៅឡើយទេ៕
ខេម ជួបគ្រោះថ្នាក់ចរាចរណ៍ ដែលមានអ្នកស្លាប់ និងរបួស
Reviewed by No Cam
on
11:17:00 PM
Rating:
Reviewed by No Cam
on
11:17:00 PM
Rating:
No comments: