U-១៣កម្ពុជាទៅប្រកួតកម្មវិធីបុណ្យមួយនៅចិន ១សប្ដាហ៍
ក្រុមកីឡាបាល់ទាត់ជម្រើសជាតិកម្ពុជាអាយុក្រោម ១៣ឆ្នាំ (U-13) នឹងទៅចូលរួមប្រកួតបាល់ទាត់ក្នុងកម្មវិធីបុណ្យមួយ ដែលរៀបចំឡើងនៅប្រទេសចិនរយៈពេល ១សប្ដាហ៍ចន្លោះពីថ្ងៃទី២៨ ខែកក្កដា ដល់ថ្ងៃទី៤ ខែសីហា ឆ្នាំ២០១៦។
លោក ជឿន សុភី គ្រូបង្វឹកក្រុមជម្រើសជាតិកម្ពុជាក្រោមអាយុ ១៣ឆ្នាំបានឲ្យដឹងថា លោកមិនទាន់ច្បាស់ពីពេលវេលាជាក់លាក់សម្រាប់ចេញដំណើរទៅចូលរួម កម្មវិធីខាងលើនៅឡើយទេ។ គ្រាន់តែដឹងពីពេលវេលា ដែលកម្មវិធីចាប់ផ្ដើមប៉ុណ្ណោះ។
គ្រូបង្វឹករូបនេះបន្តថា កម្មវិធីខាងលើ នឹងមានប្រទេសចំនួន ១១ក្នុងតំបន់អាស៊ីចូលរួម។ ចំណែកកីឡាកររបស់លោកបានជ្រើសចេញថ្នាលយុវជនក្នុងក្លឹបអាជីព របស់កម្ពុជា មានដូចជាភ្នំពេញក្រោន ព្រះខ័នរាជស្វាយរៀង ប៉ូលិស និងទ័ពជាដើម។
លោកបន្ថែមថា កីឡាករបានជ្រើសរើសរួចរាល់ ប៉ុន្តែមិនទាន់កំណត់ពេលវេលា និងទីកន្លែងដើម្បីចាប់ផ្ដើមហ្វឹកហាត់នោះទេ។ លោកបានដាក់លិខិតស្នើដល់សហព័ន្ធកីឡាបាល់ទាត់កម្ពុជា ដើម្បីសុំទីលានបាល់ទាត់ពហុកីឡដ្ឋានជាតិធ្វើការហ្វឹកហាត់រៀងរាល់ ថ្ងៃសៅរ៍ និងអាទិត្យ ប៉ុន្តែសហព័ន្ធមិនទាន់ផ្ដល់ដំណឹងឡើយ។
ក្រុមកីឡាករ U-13 ជម្រើសជាតិកម្ពុជាបានត្រូវបានលោក ជឿន សុភី ជ្រើសរើសកាលពីថ្ងៃអាទិត្យ ទី១៥ ខែឧសភា ឆ្នាំ២០១៦ នៅពហុកីឡដ្ឋានជាតិ ដែលមានចំនួន ១៥នាក់៕
U-១៣កម្ពុជាទៅប្រកួតកម្មវិធីបុណ្យមួយនៅចិន ១សប្ដាហ៍
Reviewed by No Cam
on
8:03:00 AM
Rating:
No comments: